Ministri i Financave, Punës dhe Transfereve, Hekuran Murati, ka nënshkruar sot marrëveshjen e grantit në vlerë prej 5 milionë eurosh, së bashku me drejtorin e Bankës Evropiane për Rindërtim dhe Zhvillim, Sergiy Maslichenko dhe përfaqësuesin e kompanisë rajonale të ujësjellësit “Mitrovica”, Bashkim Kurti.
Projekti do të përmirësojë ndjeshëm kushtet e jetesës për rreth 123 mijë banorë të kësaj zone, duke reduktuar ndjeshëm ndotjen mjedisore dhe duke kontribuar në mbrojtjen e burimeve ujore lokale nga shkarkimet e ujërave të zeza të patrajtuara.
Deri tani, vlera totale e financimit për këtë projekt arrin në rreth 38 milionë euro, ku granti prej 5 milionë euro është siguruar si rezultat i aplikimit të suksesshëm të Kosovës në Kornizën e Investimeve për Ballkanin Perëndimor.
Kjo marrëveshje është dëshmi e përkushtimit për zhvillim të qëndrueshëm, mbrojtje të mjedisit dhe garantim të shërbimeve cilësore për qytetarët.
