Deputeti i PDK-së, Ferat Shala, ka thënë se të gjithë zyrtarët që mbajnë pozita si “ushtrues detyre”, nga sot janë jofunksionalë.
Kjo për shkak të ligjit për zyrtarët publikë, neni 35 që ka hyrë në fuqi tashmë një vit.
“Funksionet me ushtrues detyre – Ministria e Mjedisit, Planifikimit Hapësinor dhe Infrastrukturës.
Kjo ministri, por jo e vetmja, nga sot praktikisht ka dhjetra sektorë dhe departamente, pozita drejtorësh e agjencish, që janë jo funksionale.
Çdo vendimmarrje brenda këtyre institucioneve që mbajnë pozita “ushtrues detyre”, përkatësisht zëvendësues, që nga sot janë krejt të paligjshme, sepse këtë e thotë Ligji NR.08/L-197 për zyrtarët publikë, kapitulli III, Neni 35, ligj ky i cili ka hyrë në fuqi tashmë një vit.
Është e habitshme se si një qeveri e tërë punon jashtligjshëm, e vendimet e kësaj qeverie nga sot për të gjitha pozitat e lartcekura, janë të pavlefshme.
Për ta ilustruar këtë shembull të keqqeverisjes apo paaftësisë qeverisëse, më lejoni t’jua permend një listë të “ushtruesve” në këtë qeveri, përkatësisht në këtë ministri:
Sekretari i përgjithshëm i ministrisë, ushtrues detyre,
Drejtori i Agjencisë së Mjedisit, ushtrues detyre,
Drejtori i Autoritetit të Rajonit të Pellgjeve Lumore, ushtrues detyre,
Drejtori i Departamentit të Mjedisit, ushtrues detyre,
Drejtori i Agjencisë Kadastrale të Kosovës, ushtrues detyre,
Drejtori i Departamentit për Integrime Evropiane, ushtrues detyre.
Shihni edhe një fakt të çuditshëm; në pozita shumë të larta, ka raste kur një zyrtar ka ushtruar pozitën e Sekretarit të Përgjithshëm, pas një periudhe ka kaluar ushtrues detyre në Agjenci të Mjedisit, pastaj pas një periudhe tjetër prap është kthyer ushtrues detyre i sekretarit. Pra, kemi të bejme me ushtrues të shumëfisht, “ushtrues të ushtruesve” e manipulime të tilla.
Për më keq, ka pozita ku “ushtruesi” është emëruar kundërligjshëm, duke kapërcyer shume “shkallë” nga pozita e zyrtarit, në ushtrues detyre i Drejtorit të Departamentit.
Pse ndodh kjo?! – Arsyeja e vetme është që ata të jenë më të “dëgjueshëm dhe të kontrollueshëm”, dhe rasti më ilustrativ për dëgjueshmërinë së tyre, është afera tashmë publike e Ambalazhuesve të Ujit” shkruan Shala në reagim./Indeksonline/
