Ky është 23-vjeçari i arrestuar për tentim vrasjen e axhës në Skenderaj – nuk duroi kritikat për muzikën me zë të lartë

Një ngjarje të rëndë që ka ndodhur mbrëmë në fshatin Tërnovë të Skenderajt, ku një konflikt banal mes familjarëve ka përfunduar në tentim vrasjeje.

Burimet e Sinjalit bëjnë me dije se i dyshuari është Sh.K, 23 vjeç, i cili u arrestua nga Policia pasi dyshohet se e theri me thikë axhën e tij, S. K, 61-vjeçar.

Ngjarja ndodhi pasi viktima i kishte kërkuar nipit të ulte muzikën që po e dëgjonte me zë të lartë në veturën e tij. Pas këtij momenti, i riu shkoi në shtëpi, mori një thikë dhe u rikthye duke e sulmuar axhën e tij në oborr, duke e plagosur rëndë.

Viktima u dërgua fillimisht në QKMF Istog dhe më pas në Spitalin Rajonal të Pejës, ku po merr trajtimin e nevojshëm.

 

I dyshuari është ndaluar për 48 orë me urdhër të Prokurorit dhe ndaj tij është iniciuar rasti “Vrasje në tentativë”.

 

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.