𝐏𝐞̈𝐫𝐮𝐫𝐢𝐦𝐢 𝐢 𝐍𝐣𝐞̈𝐬𝐢𝐬𝐞̈ 𝐬𝐞̈ 𝐏𝐞̈𝐫𝐩𝐮𝐧𝐢𝐦𝐢𝐭 𝐭𝐞̈ 𝐐𝐮𝐦𝐞̈𝐬𝐡𝐭𝐢𝐭 ❞𝐓𝐫𝐚𝐝𝐢𝐭𝐚 𝐞 𝐃𝐣𝐚𝐭𝐡𝐢𝐭 𝐁𝐣𝐞𝐬𝐡𝐤𝐚❞ 𝐧𝐞̈ 𝐊𝐨𝐦𝐮𝐧𝐞̈𝐧 𝐞 𝐃𝐫𝐞𝐧𝐚𝐬𝐢𝐭

Drejtoresha e Bujqësisë në Komunën e Drenasit, Anita Avdullahu, pati kënaqësinë të marrë pjesë në ceremoninë e përurimit të njësisë së re të përpunimit të qumështit, “Tradita e Djathit Bjeshka”, nën drejtimin e znj. Luljeta Hoxha. Kjo njësi, e vendosur në një zonë rurale të pasur me burime natyrore, është një arritje e rëndësishme për zhvillimin e bujqësisë në Komunën tonë.

Iniciativa u realizua në bashkëpunim me IADK, e cila ka organizuar trajnime profesionale për përvetësimin e njohurive në prodhimin e djathit dhe përpunimin e produkteve të tjera të qumështit. Trajnimet kanë përfshirë njohuri të avancuara për standardet higjienike dhe përdorimin e pajisjeve profesionale, të cilat janë kyçe për ruajtjen e cilësisë dhe traditës së produkteve.

Ky projekt është pjesë e programit “Përmirësimi i Punësimit dhe Mundësive për Gjenerim të Të Ardhurave në Zonat Rurale të Kosovës”, i cili mbështetet nga donatori gjerman Brot für die Welt dhe zbatohet me bashkëpunimin e ngushtë të Komunës së Drenasit. Përmes tij, synohet krijimi i vendeve të reja të punës, si dhe fuqizimi i kapaciteteve të grave dhe të rinjve në zonat rurale për t’i angazhuar ata në sektorin e përpunimit të qumështit dhe në zhvillimin e bizneseve të qëndrueshme lokale.

Drejtoria e Bujqësisë është krenare për këtë hap të ri dhe do të vazhdojë të mbështesë nisma që përmirësojnë cilësinë e jetës dhe ofrojnë mundësi për zhvillim në komunitetin tonë.